مدونه الشاعرعبدالقادر الحاج حسن المزیدی

         بسم الله الرحمن الرحيم              

عنوان القصيده :احسن نديم

لوهويت اتـخاوي خـاوي الما ايبيع اسرارك

اولو ردت احسن نـديم الـما  ا يمل اشعارك

اومن كلامه الـعذب  يستـر لوسمع خطارك

اليحچي عن تاريخ  اهلنه الشيدو  ابعـز دارك

العاشوابعــزّت نفس مــا  سلّموا للعارك

اسنـد التملك الثّـروا المكتبـه  البـديارك

الكتاب اليحمل   اسنين  الطوال  افكــارك

ياهنيـالـه  السعا النشـر الكتاب وشـارك

الكتاب اينــوّر افكارك وايضل تـذكارك

الكتاب ايهــز مشاعــر لنّصـر ثـوارك

الكتاب الـتاخــذ امنهل  الظلم بي ثـارك

الكتـاب الينقـل الجيـل اليجـي اخبـارك

لوردت اخبــار  اهلنه اسعي طالعلك اكتاب

ياشبـاب انتبه وصحاواخـذ  عـبره ياشباب

اصحا لاتنغـزي افكارك لا اتطفح عل سراب

امشي ابدرب الصحيح  ولا اتغشك هل احزاب

انتبه واخذ الحـذرمنهه الوجّهت ضدك اطواب

اتشـوفها ابــزي نـاس لاچنهم اذيــاب

ذوله بس بلعلم منهم تگــدر اتشيـل النّگاب

بلعلم نوّر طـريجك واحسب الوكتك احساب

بلعلم توصل مــرادك لااتگول الامل خـاب

بلعلم شد عزم حيلك وابني اديـارك خـراب

بلعلم شاطـر خصيمك واخـذ حگك لاتهاب

بلعلم تعرف  البـاري  والنّـبي وداحـي الباب

العلم ثـروه العلم عـزّه العلم جـاه ومـنزلـه

العلم رب الكون بـكتابــه النبينـه نـزّلـه

اوعلّمه وگلّـه لل امه نبـي الــرحمـه  رتّله

او رتلــه لل امـم طـه والعلينـه حــلله

اوبلغّا ابيــوم الغـديـر العلم طــه وفصله

والعلم كلـه انجمع بارض الطفوف ابكـربـله

اودرّسـه حسين ابـو اليمه ابيوم  عـاشر للمله

درس حريـه وجهاد  اخلاص خـوّه ومـرجله

احسين اعظم درس درسـه المـات محـد غسّله

عـاجـز السان القلم واشما كتب عنّـه ومـله

اليسعي النشـر العلوم الـخـير اكيـد ايحصّله

العلم مـاي العـذب بيه تنتعش ورده  الـذابله

عبدالقادر الحاج حسن لمزيدي (نادري)

 20/3/86  24/ربيع الثاني 1427